انك تمشي موزون ومش بتطوح وثابت علي الارض وشاعر ان كل حاجه حواليك ثابته في مكانها ,دي عمليه بتحتاج لتضافر علي الاقل 3 اجهزه في الجسم
كلهم بيصبوا معلوماتهم في سنتر خاص او عضو خاص بالاتزان هوا اللي بيحلل المعلومات دي ويظبطها ويرتبها علشان في الاخر توصل انك تكون متزن
العضو ده بمثابه المازر بورد للاتزان ووزنه ما يزدش عن 200 جرام في اسفل المخ اسمه المخيخ ,,مكون من فصين واحد يمين وواحد شمال
ده الكمبيوتر اللي بيسستم المعلومات والاشارات اللي بتجيله من باقي الاجهزه المسئوله عن الاتزان
اول حاجه مسئوله عن الاتزان هيا مستقبلات علي الجلد مسئوله عن الاحساس بوزنك بموقعك بالنسبه للارض واللي حواليك بوضع راسك من باقي جسمك ,,وهيا متصله بالياف عصبيه مع العضلات الحركيه اللي بتوصلها اشارات من هذه المستقبلات علشان تنقبض اتقبضات محسوبه تعدل من وضع جسمك اثناء الجركه علشان يفضل ثابت ومتزن ومش معوج
كل خطوه انت بتخطيها فيها حركه واتقباض ل200 عضله كلها بتنقبض بتتابع معين وبدرجات مختلفه علشان الخطوه تبقي ثابته ومش مهزوزه ومش مرعوشه ولمسافه معينه كمان
العضو التاني الل يبيبعت اشارات للمخيخ خاصه بالاتزان هوا العين ,اللي برضه بتحدد المسافات والابعاد وتحدد وضعك بالنسبه للي حواليك وبالنسبه للارض وحركتك اذا كانت بسرعه او ببطء
وحركه العين اللي بتتناسب مع سرعه حركتك
اخر عضو مسئول عن الاتزان هوا الاذن الداخليه اللي فيها قنوات هلاليه معينه في تلات اتجاهات بنحدد بالضبط مكانك,,, وجواها سائل بيتهز بقدر الاهتزازات اللي بتحصل مع حركتك وسرعه اهتزازه قد سرعه الحركه بالفمتو ثانيه علشان يضمن دايما انك تحس بالحركه بالمقدار المناسب
بداخل القنوات دي وعلي احنكاك مباشر بالسائل اللي جواها شكل الخلايا مميز جدا وله زوائد تشبه لهب الشمعه ورقيقه خالص ,,حركه السائل ده بتحرك الزوائد دي بمقدار معين ,,يتم ترجمته داخل الاذن الداخليه باشارات للمخيخ تحدد بالظبط مقدار الحركه
علشان كده في بعض التهابات الاذن الداخليه السائل ده بيزيد شويه وبالتالي الاتزان بيتاثر لغايه ما يرجع السائل لوضعه الطبيعي
المخيخ بيشتغل علي كل الاشارات اللي بتجيله من ال3 اجهزه الاساسيه دول ويبعت اشارات مكافئه لكل حركه بالملي
يعني العين شافت انك حتتحرك والعضلات انقبضت بالضبط علي قد الحركه والاذن الداخليه من خلال السائل الل بداخل قنواتها حست بالحركه ,,كل دول يترجمهم المخيخ للقشره المخيه بصوره معينه توازي هذه الحركه,,,, اي اختلاف عنها ولو بملي يخليك تحس بعدم اتزان
كل ده بيحصل في جسمنا في اجزاء من الثانيه وبصوره تلقائيه تماما من غير ما نشعر
شفتوا عظمه الخالق سبحانه وتعالي
اشوفكم قريبا في حلقات جديده
د عمرو لطفي ,,,,
ليست هناك تعليقات:
إرسال تعليق