برد ثلج إعصار // بقلم وهيبة سكر

برد تلج اعصار
*****
كنا زمان
نجري ونلعب
مع المطر

قلوبنا كانت دفا
واللقمة

كانت هنية
مع لمة الجيران

كان الحب مالينا
نضحك ونلعب

والبال خالي

ولا عمرنا نعينا الهم

ولا فكرنا في يوم
نشيل الهم

كانت قعدة الجدة

وصينية القهوة

والقط مشمش
يقرقر دفا

كان الهنا ببلاش
والفحم

وابو فروة

وريحة شوي
البطاطا

كنا زمان
اسعد كتير

لاكان فيه الم
ولا غم

الكل رغم الفقر
يبات في عز البرد

واكل وشبعان
ودفيان

بالحب دفيان
بالرضا
دفيان

متهني وسعيد
بقلبله

ايه اللي جرى فينا
ليه الهم والكرب

احتل قلوب الكل
الكل غير راض
وحزنان

خايف اوي من بكره
قافل عليه
بابه

ما يهمه جاره واكل
ولا جعان

مابقتش الناس حتي
السلام
ماترده

ايه يا زمان ؟
مالك

احنا اللي اتغيرنا
ولا انت

مش راضي بينا

ايه اللي جرى فينا
والأيام تشبه بعضها

ويوم يجر يوم

والعمر يخلص جري

ونلاقي نفسنا بالاخير

لاجيران ولا حب ولا صحبة
ولا ضحكة حلوة زي زمان

ولا لقمة هنية

ولا جدتي ولا أمي

وخلص الهنا

والمطر ييجي ويرحل

واحنا في الهم

ماعاد فينا همة

ولا كلمة حلوة
ماشيين وخلاص

يقطعنا الزمان

وتخلص الايام

علي فين رايحين
ما احناش عارفين

كلها أيام وتمر
ويخلص العمر

ونطلع منها بسراب

// بقلم وهيبة سكر //