خايف على كل شئ
على ديني
على إيمان قلبي
على وطني
على إبني
على بنتي
على نفسي
حتى على تراب أمي خايف
على كتبي
على يوم ماتطلع فيه الشمس
على نجوم وقمر
خايف
ولون السما الازرق عليه أنا خايف
خايف في يوم يبطل العصفور
في الفجر يزقزق يسبح
وعلى يوم ما ييجي الكروان فيه يردد تسابيحه
وعلى يمامة الصبح انا خايف ماتجيش يوم على شباكي
وخايف نبطل نحب الوطن
ويبطل الكمان والناي
خايف على بيتى على عرضى على شرفي
مرعوب على ثلبي يبطل يحب
خايف على تقاليدي وقيمي تتبدل
خايف الورد ييجي يوم مايزهر والكون بيه يتعطر
خايفة الارض تبطل تخضر
ويجف النيل وينهد البنيان
خايف على الانسان كل الانسان
اللي ماتت فيه النخوة
خايف من لساني ماينطق الشهادة ويعرف الاجابة
خايف من ربي يوم النشور
والاقي صفحتي قدام الخلق متبعترة
لولا أم الشهيد
اللي واصلة للسما بكبرياءها
رغم الألم والحرقة
لولاك ياعظيمة
صامدة كما الوتد
كنت قلت
على الكون السلام
هي دي بس
اللي اديتني الامل كل الامل
ان لسه فيه انسان
حيّ جوّاه قلب
هي دي صرخة الحياة
ودعاءها واصل للسما
ولسه فيه زيها كتير مش خايفين
مؤمنين
صامدين
لما شفتها
اتبدد الخوف جوايّا
وقلت هي دي اللي هاتلون السما الزرقا من تاني
ويفيض النيل
والقمح والخضرة
والامل
يصحى من تاني
ويغرد الكروان
ويزقزق العصفور
ويتعطرالكون
لما دعاءك ياصامدة
يامصر
يّرجع لنا
أغانينا
علي شط نيلك
من تاني
واوعي يامصر تخافي من تاني
ده لسه فيه ناس مؤمنة بيك
وهاترجعي تاني
مرفوعة الراس في العلالي
ما تتركيني يامصر من تاني
لخوفي
دا انت الروح والامل
لولاك ما كنت ولا كانت الدنيا
انت الدنيا وام الدنيا
يامصر
// بقلم وهيبة سكر //
ليست هناك تعليقات:
إرسال تعليق