أنا شايفة كلّ اللي في الصورة قدام عينيّا
زبد زبد زبد
مرمي علي الشط كوم
وهاييجي يوم
ريح عفية عتيّة
تقلبْ تغربلْ تغطي الزبدْ
وتكنس في سكتها
كل اللي قتل واللي ظلم واللي نهب
واللي ماخاف من يوم الحساب
واللي كان فاكر أنه دايم
للأبد
ماهو كلهُ يوم
بس يوم
وتنتهي كلّ الأمور
والي ماهمه الا نفسه
واللي تجبر على الخلق
واللي قلبه مات واندفن
واللي قال انه يقدر على كل شئ
دا انت ياعمي ما تساوي شئ
دا انت في ثانية تبقي عدم
ويّجروا قوام قوام يردموا عليك التراب
خوفاً من العفن
كلّ في الصورة يوم هايندفن تحت التراب
وربك يجيب ناس تحب ربّها
وتوحده وتبجله وتحب بعضها
وييجي خير كتير كتير يأكلّ الفقير
والخير يعم
بس لما تيجي الريح العفية
تنظف الشط من الزبد
وربك الكريم
مايضيم الضعيف
اللي مسلم أمره اليه
وواقف بيدعي بين ايديه
والكل الكل ماشي في الطريق
اللي ظلم واللي تظلم
كله جنب بعض ورا بعض
وكل يوم يمر يقرب البعيد
اللي متصورينه بعيد
خطوة ورا خطوة
نلاقي نفسنا كلنا في يوم الحساب
اللي غني ورقص
والكل ماشي بأسمع الخطوات
ترن علي حصي الطريق الطويل
بُم بُم بُم بُم
وخدانا كُلنا في سكة نهاية مافيهاش رجوع
ويوم الحساب قريب
والكل رايح اليه
في الطريق اللي اترسم منذ الازل
الغني جنب الفقير
والوزير والغفير
القاتل والقتيل
كله ماشي في الطريق
وفي خطوة بنقرب من نهاية
واللي تولد
واللي لسة هايتولد
واللي لسه في علم الغيب
برضه ماشي في الطريق
بُم بُم بُم بُم
// بقلم وهيبة سكر//
ليست هناك تعليقات:
إرسال تعليق