17 فبراير 2016

كان نفسي في ولد وحلمت كتير بولد وجاني الولد // كتبتها ابريل 2008 بقلم وهيبة سكر

كان نفسي في ولد وحلمت كتير بولـــــــــــــــــــد وجاني الولد // كتبتها في ابريل 2008
________________________________________________________________
كان نفسي في ولد من ولاد البلد اللي رضعوا بجد من حليب النيل
وعاش في ضل النخيل وشمس الاصيل وعشق الناي والمووايل
واللي في أنفاسه ريحة العيش وأكل من تراب الأرض قمح وذرة
واللي اتنفس نسمة هوا رايقة ساعة عصرية مع الاصحاب علي الترعة
كان نفسي في ولد عشق الأرض يحمي بدمه العرض ابن فلاح
شقيان عرف معنى الشقا والضنى والعرق
عرف ازاي يقرأ كتابه ودروسه على ضي لمبة جاز
وعرف وحب عم بشاي وعم داوود وأم جرجس وأم محمد وأم ابراهيم
وعرف ازاي يقسم الرغيف واللقمة بالحب بين الاهل
كان نفسي في ولد وشه رايق رايق مليان حنيه
حنية على الكل يطبطب بحنية بايديه على اللي رايح واللي جاي
ويعرف ازاي يحس ويحاسب على جيرانه ويراعيهم ويدافع بشهامة عن بنات الحي
وكان نفسي في ولد جدع شهم مايهمه في الحق شي يطول السما والنجوم
شامخ في نفسه عمره ما انحني كما النخلة في العلالي ما تنحني للريح
ويعرف يجيب حقي وحق الفقير من نني عين الظالم المفتري على الخلايق
يعرف يدافع عني وعن ولادي وبناتي وعرضي وشرفي
وعمره مايدي ضهره لأهله ويتغر يالسلطان والأبهة والمدح
يثور ويهب هبته في الحق كما الطوفان ويوزع الحنية ولقمة العيش بالعدل
ولا يوم يغتر ويتنفخ كما الطاووس ولا يفتح ودانه لودودة الشر
ويامصر يامصر يا ولادة أكيد يامصر الولد اتولد وجاي
وتعالي ياابني كفاية غيبة عننا دا احنا منتظرينك
منتظرينك من زمان أأأأأوي وتعالي شوف أهلك اللي اتبهدلوا يأيد الغول وأمنا الغوله وكلابهم
اهل مصر يا ابني اتبهدلوا من عصاباتهم بالجوز والفرد تعالى طبطب على أم الشهيد
وقول لها واحضنها ماتخافي يامّه أنا جيت علشانك ما تبكي يامي
مستنيينك يا ابني من دهر وتعالى حضننا الدافي مفتوح
تعالي خد اهل بلدك في حضنك وطبطب بحنية ورد الحق
لصاحب الحق بس تعالي طالت الغيبة
تعالى
واهو جاني الولد اللي حلمت بيه وشفته كتير في منامي
جاني
سمع ندايا وجاني
أخد بأيدي
وقال يا مّه
أنا جيت علشانك
ونور حياتي
ويجري الخير على ايدينه
ربي يحفظك يا ابني
من اعادي
رايحة وجاية
بس انت قادر عليهم
ومعاك ربنا
واهل الخير
ووراك عشاق تراب البلد
والخير هل على قدومك والنصر
ونفسي اشوفك يا ابني
في العلالي نجمك ضي وشمس
وتسود العالم بالعدل والانصاف
والناس تشبع وتحمد ربها
وتنام مطمنة اوي
على ولادها وبكره اللي جاي
اهلا بيك يا ابني ونور عيني
وكل الضي
بقلم وهيبة سكر

مرسلة بواسطة في

ليست هناك تعليقات:

إرسال تعليق

الاشتراك في: تعليقات الرسالة (Atom)