خايف على كل شئ
على ديني
على الايمان في قلبي
على وطني
على أبني
على بنتي
على نفسي
حتي على تراب أمي خايفة
على كتبي
على يوم ماتطلع فيه الشمس
على النجوم والقمر
خايفة
ولون السما الازرق عليه أنا خايفة
خايفة في يوم يبطل العصفور
في الفجر يزقزق يسبح
وعلى يوم ما ييجي الكروان فيه يردد تسابيحه
وعلى يمامة الصبح انا خايفة ماتجيش يوم على شباكي
وخايفة نبطل نحب الوطن
ويبطل الكمان والناي
خايفة على بيتي على عرضي على شرفي
مرعوبة على قلبي يتغير ويبطل يحب
خايفة على تقاليدي وقيمي تتبدل
خايف الورد ييجي يوم مايزهر والكون بيه يتعطر
خايفة الارض تبطل تخضر
ويجف النيل وينهد بنيان
خايف على الانسان كل الانسان
اللي ماتت فيه النخوة
خايف من لساني ماينطق الشهادة ويعرف الاجابة
خايف من ربي يوم النشور
والاقي صفحتي قدام الخلق متبعترة
لولا أم الشهيد
اللي واصلة للسما بكبرياءها
رغم الألم والحرقة
لولاك ياعظيمة
صامدة كما الوتد
كنت قلت
علي الكون السلام
هي دي بس
اللي اديتني الامل كل الامل
ان لسه فيه انسان
حيّ جوّاه قلب
هي دي صرخة الحياة
ودعاءها واصل للسما
ولسه فيه زيها كتير مش خايفين
مؤمنين
صامدين
لما شفتها
اتبدد الخوف جوايّا
وقلت هي دي اللي هاتلون السما الزرقا من تاني
ويفيض النيل
والقمح والخضرة
والامل
يصحي من تاني
ويغرد الكروان
ويزقزق العصفور
وتعطر الكون
لما دعاءك ياصامدة
يامصر
يّرجع لنا
أغانينا
على شط نيلك
من تاني
واوعي يامصر تخافي من تاني
ده لسه فيه ناس مؤمنة بيك
وهاترجعي تاني
مرفوعة الراس في العلالي
ما تتركيني يامصر من تاني
لخوفي
دا انت الروح والامل
لولاك ما كنت ولا كانت الدنيا
انت الدنيا وام الدنيا
يامصر
// بقلم وهيبة سكر //
ليست هناك تعليقات:
إرسال تعليق