لسه فيه حاجات كتير
حلوة
لسه في قلب القسوة رحمة
وفي قلب الشر خير
وفي قلب الانسان
كل انسان
نور
بصيص نور
ومن قلب الموت تتولد الحياة
ولسه في الكون ورد بيفتح
وفيه موسيقي وشعر
ولسه الناس بتحب
ولسه الاحلام ممكنة
والامل في القلوب
مزروع
بذرة
تحن للميّة
ترتوي
لسه الحياة ممكنة
ولسه فيه غُنا وأغاني
ووليد بيتولد
يصرخ صرخة الحياة
وفيه آذان للفجر
وفي كل وقت
وكروان يردد في السما
الملك لك لك لك
وفيه بكره
وشمس بكره
وضي القمر
جايّ
ينور سمانا وأرضنا وبحرنا
وفيه لسه ناس بتحب بعضها
وفيه لسه أم بتودع أبنها
وتدعي من قلبها
يرجع لها
وفي قلب الأم صبر
والأمل في الله
كبير كبير كبير
وبابه مفتوح
للداعي والباكي والتائب
وايديه الكريمة ممدودة بالغفران
والرحمة موجودة من الرحمن
لسه الحياة ممكنة
ولسه فيه أمل
في توبة وغفران
ودعاء مستجاب
وتنصلح الأحوال
ويبات الجوعان شبعان
والعريّان دفيان
ويرجع الأسير
لسه فيه حاجات كتير كتير كتير حلوة
نعيش من أجلها
نفرح نغني نحب ندعو الله
لسه فيه رحمة الرحمن
والأمل في الله
الأمل في الله
// بقلم وهيبة سكر //
ليست هناك تعليقات:
إرسال تعليق